Arkivoj de etikedoj: naskiĝdatreveno

Ĉiu tago estas grimpado supren al la monteto

La vivo estas granda miraklo. Kiom ĝi povas ŝanĝiĝi ene de unu jaro! Kaj eĉ en pozitiva senco!

Hodiaŭ mi iĝis 38-jaraĝa. Kaj kompare al la pasinta jaro, preskaŭ ĉio estas alia. Kiam mi estis pasintfoje tiom feliĉa? Ĉu kun 32 jaroj? Ĉu kun 23 jaroj? Ĉu iam entute?

Ekde duona jaro mi paŭzas de la laboro (kaj blogas pri tio en la germana). Post ĝenerale sukcesa jaro, kiun mi el hodiaŭa vidpunkto konsideras rekonstruan jaron, mi prenis tempon por mi mem.

Mi ĉesis ludi laŭ la reguloj de la socio – kaj subite mi estas libera homo. Mi vidas ĉion nun en tute nova stat’.

Rilate al sano, mi estas en tiom bona stato kiel ekde ok jaroj ne plu. Nun estas verŝajne la due plej bona tempo en mia ĝisnuna vivo rilate al tio!

Mi uzis la malkontenton kaj ĉagrenon, kiuj kolektiĝis en mi, por fari ion bonan kaj kreivan. Mi multe vojaĝis kaj muzikis.

Nun mi rikoltas multajn bonajn aferojn, kiujn mi semis en la malbonaj jaroj. Mi tamen daŭre miras. Kaj tio estas tre bona sento.

Pri muziko: La kanto “Don’t Give Up” de Chicane akompanis min dum multaj jaroj. Hieraŭ mi aŭskultis ĝin en koncerto de la artisto (mi blogis pli detale pri tio en la germana). Interese, ke ĝi neniom perdis sian kvaliton – ĝi estas kaj restas bonega kanto, sendepende de mia aktuala vivsituacio.

Chicane: Don’t Give Up (Reboot 2014) (ekde 52:55)

Mi ne volas sekvi morton kaj ĉiujn ĝiajn amikojn

Ekde hodiaŭ mi havas 35 jarojn. Kiel pasintjare en decembro, mi devas konstati, ke mi tute neglektis mian taglibron dum la pasintaj monatoj. Denove veras la ironio, ke aŭ oni vivas aŭ oni skribas pri sia vivo.

Sed la utilo de tio, skribi siajn pensojn, estas tamen impresa. Mi relegis, kion mi skribis dum mia 27a, 28a, 29a, 30a, 31a, 32a kaj 33a naskiĝdatreveno. (Dum mia 34a naskiĝdatreveno mi skribis nenion, ĉar tiam daŭre regis granda paŭzo en mia taglibro – kiom domaĝe! Ke mi rompis la tradicion, diras ĉion pri mia tiama animstato.) Ial mi pensis, ke dum la antaŭaj jaroj mi malĝuste pritaksis la vivon. Sed nun mi surprize konstatas, ke mi havis ĝustan prijuĝon kaj ke mi jam antaŭe trovis klarajn vortojn. Ankaŭ impresas min, ke mi jam dum la pasintaj jaroj ofte sukcesis trovi taŭgan kanton kaj/aŭ citaĵon.

Por ĉi tiu jaro, tio estas Coldplay-citaĵo. Ĝi jam antaŭe kaptis mian atenton, sed intertempe mi ŝatas eĉ pli grandan parton de la teksto:

“Ne, mi ne volas batali de la komenco ĝis la fino
Mi ne volas ciklon de reuzita venĝo
Mi ne volas sekvi morton kaj ĉiujn ĝiajn amikojn”
(Death And All His Friends)

Kaj por kompletigi la reuzadon de muziko kaj citaĵoj (“ĉar daŭre la samaj kantaĵoj validas” – Persone-citaĵo), jen kanto kiu venis al mia menso hodiaŭ posttagmeze. Pri “Dream On” de Depeche Mode mi jam skribis antaŭ pli ol kvin jaroj