Arkivoj de etikedoj: les rita mitsouko

Marcia dancas

Ĉijare mi ne nur akiris diskon, kiun mi estis serĉanta dum pli ol dek jaroj, sed ankaŭ denove montris, ke mi havas impresan muzikan memoron, precipe kiam temas pri retrovado de kantoj. Ĉio komenciĝis dum la 47a Internacia Seminario (IS) 2003/04 en Naumburg/Saale. Dum unu el la lastaj noktoj, Flavie Audibert dancis tre pasie en la diskoteko al iu franclingva kanto. Mi nur memoris, ke kantis virino kaj en mia kapo restis melodio de iu instrumento en la refreno (plej proksima priskribo: klavaro kun sono simila al latunaj blovinstrumentoj).

Neniam poste mi aŭskultis la kanton. Sed kiam mi estis en Berlino en majo, dum Wii-ludado de “Just dance 3”, la konata melodio eksonis. Kelkaj sekundoj sufiĉis por rekoni la kanton.

Les Rita Mitsouko: Marcia Baïla

Hejme mi tuj serĉis videon de la kanto kaj informojn pri ĝi kaj la grupo. “Marcia Baïla” estis grandega sukceso en Francujo en 1985, kvazaŭ “somera furoraĵo”. Per la kanto Les Rita Mitsouko memorigas pri amikino, kiu estis dancistino, sed mortis pro kancero.

Mi pensas, ke la tempo agis tre favore al tiu kanto. Ĝi sonas daŭre sufiĉe freŝe kaj spice kaj invitas al dancado. Kaj mi tre ĝojas, ke mi kapablis solvi tiun personan muzikan misteron en 2012!