Trans la akvo, trans la herbejo

Jam pli frue mi menciis, ke ekzistas publikaj libroŝrankoj en mia urbo Münster. Krome mi menciis jam la duan fojon Bookcrossing kaj mian intencon, iam pritrakti tiun temon pli detale. Kiel baza priskribo en unu frazo servu jena klarigo: Tio estas TTT-ejo por registri librojn kaj poste sekvi ilian vojaĝon tra la mondo (simila al Eurobilltracker, sed kun multe pli interesa afero, nome libroj anstataŭ monbiletoj). Kombinita kun publikaj libroŝrankoj, eblas facile liberiĝi de superfluaj libroj (sed tamen legi, kion opinias aliaj legintoj pri ĝi) kaj trovi mem interesan literaturon. Krome per mia aktiveco tie mi facile observas, kiom multajn librojn mi jam fordonis. Intertempe ekzistas aparta librokesto kun libroj en diversaj lingvoj, kiu aperas ĉe Esperanto-renkontiĝoj, unue dum la Germana Esperanto-Kongreso (GEK) 2011 en Münster.

Sed tio eĉ ankoraŭ ne estas ĉio: Mi konatiĝis kun tri virinoj tra Bookcrossing. Unue ni skribis en forumo pri la deziro, renkontiĝi – kaj tiam ni simple faris tion! Mi estis impresita, kiom ĉarmaj virinoj supozeble longe sidas antaŭ la komputilo (pro Bookcrossing). Kaj kvazaŭ tio ne sufiĉus, mi eksciis tra ili pri librovendejoj, kiujn mi ankoraŭ ne konis!

Unu el ili nomiĝas Poptanke. Ĝi vendas brokantaĵojn. La libroj tie ne tiom interesis min dum mia unua vizito, sed la oferto de uzitaj diskoj des pli! Mi pasigis longan tempon trarigardante ĉiujn stilojn. Subite unu kompaktdisko trafis mian atenton. Sur ĝia titolo montriĝis rajdisto kaj la grupo nomiĝas “The Ukrainians” (“La Ukrainanoj” en la angla). Kio estas tio?

Kiel mi eltrovis, ekzistas muzikgrupo en Britujo, kiu konsistas el Ukrainanoj, kiuj reludas tradiciajn Ukrainajn kantojn same kiel punkon tradukitan al la ukraina. La disko “The Ukrainians / Українци” (el la jaro 1991) ŝajnis al mi bonega muzika preparo por la 67a Internacia Junulara Kongeso (IJK) en Kievo (Ukrainujo), kaj tial mi aĉetis ĝin, same kiel alian albumon kun la nomo Vorony / Ворони, kio estas la sekva disko (el la jaro 1993) kun tradicia ornamaĵo sur la titolo kaj en la koloroj blua kaj flava, same kiel la flago de Ukrainujo.

Post la unua aüskultado, mi elektis po du kantojn el ĉiu albumo por ludado en la diskoteko. Ĉu mi entute ludus ilin, tiam ankoraŭ ne estis certa, sed ili ŝajnis esti la plej danceblaj:

  • Hopak / Гопак
  • Cherez Richku, Cherez Hai / Через річку, через гай
  • Chlib / Хліб
  • Shche Raz / Ще раз

Respondi

Retpoŝtadreso ne estos publikigita. Devigaj kampoj estas markitaj *

Kvizo kontraŭ rubokomentoj: