Tra mia patro kaj tra Flo de Vinilkosmo mi eksciis pri nova, tre interesa projekto: Prepariĝas DVD kun la titolo “Esperanto elektronike“. La listo de la alcelita enhavo legeblas ĉe la TTT-ejo de la projekto. La dezirata materialo similas al tiu de pluraj komputilaj kompaktdiskoj, kiujn diversaj organizoj aŭ unuopuloj provis eldoni aŭ (kelkfoje) vere realigis eldoni.

Ial mi ĉifoje estas sufiĉe optimisma, ke la projekto iĝos sukcesa. Eble tion kaŭzas, ke oni kontaktas la ĝustajn homojn sufiĉe frue. Krome antaŭmendoj estas kolektitaj amase, tiel ke oni almenaŭ ne produktas stokon kiu restos grandparte dum jardekoj forgesita en la propra kelo. Plie oni tuj akceptis proponojn por plibonigo, kiujn faris mia patro. Tio montras kunlaboremon.

Eble ankaŭ grave influas mian prijuĝon la fakto, ke Peter Balász prizorgas la preparojn. Li ja jam transprenis la filmadon dum la IS kaj tiel postlasis tre pozitivan impreson ĉe mi.

Peter (tra Flo) sendis al mi kontrakton por permesi la uzadon de mia kanto “Till kaj Gunnar faras teknon” sur la DVD. Tio plifortigis mian opinion, ke la projekto estas bone farita, ĉar oni insistis pri tiu skriba permeso pro juraj kialoj.

Nura kritikpunkto miaflanke estas, ke oni ne donis konfirmon al mi pri la ĝustatempa alveno de la kontrakto ĉe E@I. Ankaŭ la (evidente ne plu aktuala) listo de la kontribuantoj ne indikas, kiu jam sendis ion. Tie eblus ankoraŭ plibonigi la informfluon.

Sed mi ricevis laŭdon de Flo, ke mi ofertas kelkajn kantojn nur en la reto. Kiu pensintus, ke mia frua teknokanto iam tiom famigus min?